कञ्चनपुरमा नक्कली प्रहरी बनेर किशोरी अपहरण गर्ने दुइ जना पक्राउ

पश्चिम रैवार ३ दिन अगाडि

कञ्चनपुर– कञ्चनपुरमा नक्कली प्रहरी बनेर किशोरीको अपहरण गर्ने दुइ जना पक्राउ परेका छन् ।

जिल्लाको भीमदत्त नगरपालिका–१६ बस्ने ३५ वर्षीय महेशसिंह खत्री र ३३ वर्षीय धुर्व जोशीलाई १६ वर्षीया किशोरी अपहरण गरी बन्धक बनाएको आरोपमा प्रहरीले पक्राउ गरेको हो ।

उनीहरुले पुस १३ गते राति भीमदत्त नगरपालिका–६ स्थित शिव मन्दिर नजिक नहरमा साथीसँग हिँडिरहेकी ती किशोरीलाई “हामी प्रहरी हौं” भन्दै लगेको जिल्ला प्रहरी कार्यालय कञ्चनपुरका प्रहरी नायब उपरीक्षक उमेश जोशीले बताए ।

सूचना प्राप्त भएपछि खटिएको प्रहरी टोलीले १४ गते बिहान वडा नम्बर १६ वसन्तपुरबाट पीडित किशोरीको उद्दार गरेको उनले बताए ।

अपहरण र शरीर बन्धकसम्बन्धी कसुरअन्तर्गत दुबै जनाविरुद्ध जिल्ला अदालत कञ्चनपुरबाट सात दिनको म्याद थप गरी अनुसन्धान भइरहेको प्रहरीले जनाएको छ।