कतार कम्पनिले घर पठाएका बैतडीका एक युवक भारतमा मृत फेला

पश्चिम रैवार १० घण्टा अगाडि

बैतडी– बैतडीका एक युवक भारतमा मृत फेला परेका छन् ।

बैतडीको दशरथचन्द नगरपालिका–१ गुरुखोला, खाल घर भएका २६ बर्षीय टेकेन्द्र धामी भारतमा मृत फेला परेका हुन् ।

रोजगारीको सिलसिलामा ६ महिना अघिमात्रै कतार पुगेका धामी भारतको बाटो हुँदै घर फर्किरहेका थिए । घर फर्कने क्रममा उनी भारतको मुरदावादमा मृत फेला परेका मृतकका काका शेरबहादुर धामीले बताए ।

रोजगारीका लागि कतार पुगेका धामीमा मानसिक समस्या देखिएको थियो । उनको कतारमै उपचार गराएर केही निको भएपछि घर पठाइएको थियो ।

कम्पनीले कतारबाट दिल्ली हुँदै काठमाण्डौंको टिकट काटेको भएपनि उनी दिल्लीबाट जहाज नचढेर सडकको बाटो घर फर्किरहेका थिए ।

दिल्लीबाट गाडीमा चढेका धामी गाडीमा तेल हाल्ने बेला भागेका र पछि खोजी गर्दा मृत फेला परेको जानकारी आएको बताइएको छ ।

भारतीय प्रहरीको सहयोगमा खोजी गर्दा धामी बुधबार बिहान मृत फेला परेका हुन् । मृतक धामीको घरमा श्रीमति र एक छोरी रहेकी छन् ।