अछाममा एमालेको ‘जरा अभियान’ सुरु : नेताहरु गाउँ टोल केन्द्रित

धनराज साउँद २ महिना अगाडि

अछाम – नेकपा (एमाले) अछामले वडाकेन्द्रित ‘जरा अभियान’ सञ्चालन गरेको छ। आगामी चुनावमा एकल बहुमत हासिल गर्ने लक्ष्यसहित अघि बढाइएको ‘मिसन–८४’ अभियानलाई सशक्त बनाउन यो अभियान तीन महिनासम्म सञ्चालन गरिनेछ।

पार्टीका केन्द्रीय सदस्य एवं अछाम जिल्ला इन्चार्ज झपट बहादुर बोहरा का अनुसार संगठन सुदृढीकरण, जनताको चासो र गुनासो संकलन तथा समाधानको पहल अभियानको मुख्य उद्देश्य हो।

केन्द्रीय सदस्य बोहराले भन्नुभयो, “जरा अभियान वडा केन्द्रित कार्यक्रम हो। यसबाट जनतासँग प्रत्यक्ष भेटघाट गर्दै उनीहरूका समस्या र आवश्यकताहरू बुझ्ने, समाधानका लागि पहल गर्ने, साथै एमालेमाथि भइरहेको साइबर आक्रमणको प्रतिकार गर्नेछ।”

नेकपा (एमाले) अछामका अध्यक्ष चन्द्र बोहराले एमाले नेतृत्वमा भएका राम्रा कामहरू जनतासम्म पुर्याउने र जनताको सुझाव संकलन गरी समृद्धिको योजना निर्माण गर्ने लक्ष्यसहित अभियान अघि बढाइएको जानकारी दिनुभयो।

अभियानका प्रमुख उद्देश्य र कार्यसूची :

✅ वडास्तरमा प्रत्यक्ष जनसंपर्क विस्तार र संगठन बलियो बनाउने।
✅ संगठनका कमजोरी सुधार गर्दै स्थानीय तहमा एमालेको उपस्थिति मजबुत बनाउने।
✅ गैर-एमाले समर्थकलाई पार्टी नजिक ल्याउने प्रयास।
✅ सरकारको समृद्धि अभियानलाई बल पुर्याउने।
✅ स्थानीय तह तथा वडा कमिटीहरू पुनर्गठन गर्ने।
✅ चैत महिनाभित्र संगठित सदस्यता नवीकरण तथा जनसंगठन कमिटी गठन गर्ने।
✅ जनताको समस्या संकलन गर्दै समाधानका लागि प्रभावकारी पहल गर्ने।

नेकपा (एमाले) अछामका सचिव भीम रावल (कालो टोपी) का अनुसार “जनतासँग एमालेलाई अझ कसिलो गरी जोड्ने, जनताबाट सिक्ने र उनीहरूलाई पार्टीका नीति सिकाउने” अभियानको प्रमुख उद्देश्य हो।

अभियानमा गाउँ-टोल केन्द्रित नेताहरूको सक्रियता

अभियानलाई प्रभावकारी रूपमा सम्पन्न गर्न अछाममा केन्द्रीय सदस्य तथा जिल्ला इन्चार्ज झपट बोहरा, केन्द्रीय सदस्य तथा क्षेत्र नम्बर १ इन्चार्ज कमलराज तिमिल्सैना, केन्द्रीय सदस्य तथा क्षेत्र नम्बर २ इन्चार्ज यज्ञ बोगटी सक्रिय छन्।

अभियान अन्तर्गत तुर्माखाँद गाउँपालिकाका विभिन्न वडाहरूमा अभियान तीव्र रूपमा सञ्चालन भइरहेको पालिका इन्चार्ज नरेश बहादुर शाही ले जानकारी दिनुभयो।

यस्तै साँफेबगर नगरपालिका, बान्नीगढी जयगढ गाउँपालिका लगायतका वडामा पनि कार्यक्रमले तीव्रता पाएको छ।

पालिका कमिटीको निर्णयअनुसार वडागत रूपमा मिति तय गरी कार्यतालिका अनुसार कार्यक्रम सञ्चालन भइरहेको नेकपा (एमाले) अछामका सदस्य पुष्पराज भट्टले जानकारी दिनुभयो।