प्रतिनिधि सभामा आज प्रधानमन्त्रीसँग प्रत्यक्ष प्रश्नोत्तर

पश्चिम रैवार २ महिना अगाडि

काठमाडौं – संघीय संसदको प्रतिनिधि सभा बैठकमा आज प्रधानमन्त्री केपी शर्मा ओलीसँग प्रत्यक्ष प्रश्नोत्तर कार्यक्रम हुँदैछ। प्रतिनिधि सभा नियमावली २०७९ को परिच्छेद ९ अनुसार सभामुख देवराज घिमिरेले यसबारे जानकारी गराएका थिए।

आज दिउँसो १ बजे सुरु हुने बैठकमा सांसदहरूले पूर्वनिर्धारित कार्यसूचीअनुसार प्रधानमन्त्रीसँग विभिन्न ज्वलन्त विषयमा प्रश्न राख्नेछन्।

यसअघि, गत मंगलबार बसेको बैठकमा सभामुख घिमिरेले फागुन ४ गतेका लागि प्रधानमन्त्रीसँग प्रत्यक्ष प्रश्नोत्तर कार्यक्रम तय गरिएको जानकारी दिएका थिए। सोही अनुसार आजको कार्यसूचीमा यो कार्यक्रम समावेश गरिएको हो।

प्रधानमन्त्रीसँगको प्रश्नोत्तर कार्यक्रमका लागि सांसदहरूको समूह विभाजन गरिसकिएको छ। समूहमा रहेका सांसदहरूले आफ्ना प्रश्नहरू लिखित रूपमा माघ ३० गतेभित्र दर्ता गराएका थिए। ती प्रश्नहरू आजको बैठकमा प्रधानमन्त्रीलाई प्रस्तुत गरिनेछ।

प्रधानमन्त्रीसँगको प्रत्यक्ष प्रश्नोत्तर कार्यक्रम संसदमा सरकारको जवाफदेहिता र पारदर्शितालाई बल दिने महत्वपूर्ण अभ्यास मानिन्छ।