तुर्माखादमा सेटिङको खेल: कर्मचारी भर्नामा भागबण्डा, हाकिमको अडियो भाइरल!

धनराज साउँद २ महिना अगाडि

अछाम – तुर्माखाद गाउँपालिकामा कर्मचारी भर्नामा राजनैतिक भागबण्डा भएको खुलासा गर्दै सार्वजनिक गरिएको एक अडियोले गाउँपालिकामा तहल्का मच्चिएको छ।

प्रमुख प्रशासकीय अधिकृत (निमित्त) चक्रदेव भट्ट र उम्मेदवार हिक्मत बहादुर बयकबीचको टेलिफोन संवाद बाहिरिएपछि यो प्रकरणले झनै सनसनी मच्चाएको छ।

गएको माघ महिनामा गाउँपालिकाले विभिन्न पदका लागि कर्मचारी भर्ना आह्वान गरेको थियो। तर, एमआईएस अपरेटर पदका उम्मेदवार हिक्मत बहादुर बयकलाई प्रमुख प्रशासकीय अधिकृत भट्टले फोन गरेर, पदका लागि पहिले नै भागबण्डा भइसकेको भन्दै परीक्षा नदिन सुझाव दिएका थिए। बयकले भने यो अन्याय भएको बताउँदै परीक्षा दिन चाहे पनि उनलाई परीक्षा हलमै प्रवेश गर्न नदिएको दाबी गरेका छन्।

अडियो सार्वजनिक भएपछि गाउँपालिका कार्यालय र सरोकारवालाहरूमा ठूलो हलचल मच्चिएको छ। उक्त अडियोमा अधिकृत भट्टले ‘नेताहरूबीच भागबण्डा मिलिसकेको’ कुरा उल्लेख गर्दै बयकलाई परीक्षाबाट अलग रहन आग्रह गरिरहेको स्पष्ट सुनिन्छ।

भर्ना प्रक्रियामा अनियमितता?

गाउँपालिकाले गत मंसिर १० गते एमआईएस अपरेटर पदका लागि दरखास्त माग गरेको थियो। प्रारम्भिक छनोटपछि आठ जनाको नाम संक्षिप्त सूचीमा समावेश गरियो, जुन नैतिक र कानुनी रूपमा त्रुटिपूर्ण रहेको बयकको दाबी छ।

माघ ८ गतेका लागि लिखित परीक्षा तोकिएको थियो। भागबण्डा मिलेको भन्दै बयकलाई परिक्षामा सहभागी हुने वातावरण नदिईएको बयक बताउछन् ।

परिक्षामा सहभागी हुन नपाएपछि आक्रोशित बनेका बयकले कर्मचारी भर्नामा सेटिङ् गरिएको भन्दै सामाजिक संजाल फेसबुकमा विभिन्न स्टाट्स लेखेका थिए । गाउँपालिकाले उनलाई स्पष्टिकरण मागेपछि उनले अडियो सुरक्षित रहेको जानकारी गराउँदै सार्वजनिक गर्ने स्पष्टिकरण मार्फत चेतावनी दिएका थिए । हाल उनले उक्त अडियो सार्वजनिक गरिदिएका छन्।

गाउँपालिका अध्यक्ष डम्बर बहादुर बिसीले अडियो सार्वजनिक भएको विषयमा छानबिन गर्ने र दोषीमाथि कारबाही गरिने बताएका छन्। यता, प्रमुख प्रशासकीय अधिकृत चक्रदेव भट्टलाई पटक पटक टेलिफोन गर्दा उनको फोन उठेन ।

अडियो सार्वजनिक भएपछि स्थानीयबासी र राजनीतिक दलहरूबीच बहस चर्किएको छ। कर्मचारी भर्नामा पारदर्शिता खोज्दै धेरैले निष्पक्ष छानबिन र दोषीमाथि कारबाहीको माग गरिरहेका छन्।

यो प्रकरणले कर्मचारी भर्ना प्रक्रियामा निष्पक्षता र सुशासनको प्रश्न खडा गरिरहेको छ। अब गाउँपालिकाले कस्तो कदम चाल्छ र दोषीमाथि कारबाही हुन्छ कि हुँदैन, भन्ने विषयलाई स्थानीयहरू मात्र होइन, सिंगो जिल्ला नै चासोका साथ हेरिरहेको छ।

अडियो सुन्नुहोस् :-