बान्नीगढीका पूर्व जनप्रतिनिधिलाइ आपत : अख्तियार डाकेको डाक्यै

पश्चिम रैवार १ महिना अगाडि

अछाम – बान्नीगढी जयगढ गाउँपालिकाका निवर्तमान अध्यक्ष, उपाध्यक्ष र प्रशासनिक पदाधिकारीहरू अख्तियार दुरुपयोग अनुसन्धान आयोगको अनुसन्धानको घेरामा परेका छन्।

कानुनी सल्लाहकारलाई बिना हाजिर पारिश्रमिक दिएको र केही निजी फार्महरूलाई अनुदान वितरण गरेको आरोपमा उनीहरूलाई अख्तियारले बयानका लागि बोलाएको हो।

२०८० जेठ २६ गते अख्तियार दुरुपयोग अनुसन्धान आयोगको कार्यालयमा दर्ता भएको उजुरीपछि यो अनुसन्धान सुरु भएको हो।

अख्तियारले पठाएको पत्रमा पूर्व गाउँपालिका अध्यक्ष राजेन्द्र बहादुर खड्का, उपाध्यक्ष लोकबहादुर साउँद, तत्कालीन प्रमुख प्रशासकीय अधिकृत, निमित्त प्रमुख प्रशासकीय अधिकृत, शाखा अधिकृत लगायतका पदाधिकारीहरूको नाम समावेश छ। उनीहरूलाई बयानका लागि उपस्थित गराउन निर्देशन दिइएको छ।

गाउँपालिकाले अख्तियारको पत्र बमोजिम सम्बन्धित पूर्व जनप्रतिनिधिहरूलाई पत्राचार गरिसकेको जनाएको छ।

स्थानीय बासिन्दाहरूले बान्नीगढी जयगढ गाउँपालिकामा लामो समयदेखि पारदर्शिताको अभाव रहेको भन्दै पटकपटक गुनासो गर्दै आएका छन्। “हामीले पहिले पनि गाउँपालिकामा अनियमितता भएको गुनासो गरेका थियौं, अख्तियारले अनुसन्धान अघि बढाएको सुन्दा आशा पलाएको छ,” एक स्थानीय बासिन्दाले प्रतिक्रिया दिए।

यसअघि पनि अख्तियारले बान्नीगढीका पुर्व जनप्रतिनिधिलाई बयानका लागि बोलाएको थियो। सरकारी पदबाट हटिसकेपछि पनि सेवा सुविधा लिइरहेको भन्ने आरोपका आधारमा अख्तियारले केही महिना अगाडि उनीहरूको बयान लिएको थियो। सो बयानपछि ती पूर्व जनप्रतिनिधिहरूले आफूले लिएका सरकारी सामानहरू गाउँपालिकालाई फिर्ता गरेका थिए ।

अख्तियारले सुरु गरेको अनुसन्धानले बान्नीगढी जयगढ गाउँपालिकामा भएको सम्भावित अनियमितताबारे थप खुलासा गर्ने अपेक्षा गरिएको छ। यदि आरोप प्रमाणित भए, सम्बन्धित पदाधिकारीहरूमाथि कानूनी कारबाही अघि बढ्न सक्छ।

यो पनि :