स्वास्थ्य उपचारमा रहेका अधिकृत शर्मालाई स्पष्टिकरण : विवाद चुलिदै

पश्चिम रैवार १ महिना अगाडि

अछाम । अछामको साँफेबगर नगरपालिकाले कार्यालयमा जानकारी बिना अनुपस्थित भएको भन्दै निमित्त प्रमुख प्रशासकीय अधिकृत लक्ष्मी प्रसाद शर्मालाई ७२ घण्टे स्पष्टिकरण सोधेको बिषयले बजार तातेको छ। यो विषय सार्वजनिक भएसँगै नगरमा चर्को बहस सुरु भएको छ।

नगर कार्यपालिकाको बैठकले स्पष्टिकरण सोध्ने निर्णय गरेको बताइए पनि यसको आधिकारिक सूचना भने सार्वजनिक गरिएको छैन। नगर प्रमुख राजेन्द्र कुँवर र उप–प्रमुख शिलोज कुँवर यस विषयमा फरक धारणा राख्छन्। उनीहरूका अनुसार कार्यपालिकामा प्रमुख प्रशासकीय अधिकृतलाई तीन दिनभित्र सम्पर्कमा ल्याउने विषयमा मात्र छलफल भएको थियो।

शर्माको प्रतिक्रिया: घेराबन्दीको आरोप

स्पष्टिकरण सोधिएको खबर बाहिरिएपछि अधिकृत शर्मा आक्रोशित बनेका छन्। उनले आफू बिरामी भएर बयालपाटा अस्पतालमा भर्ना भएको र थप उपचारका लागि भारतको दिल्ली रेफर गरिए पश्चात् उपचारी गरि नेपाल फर्किएको बताएका छन्। अहिले पनि चिकित्सकको सल्लाहअनुसार स्वास्थ्यकर्मीको निगरानीमा आराम र उपचार गरिरहेको उनको भनाइ छ।

शर्माले केही जनप्रतिनिधिले आफ्नो निहित स्वार्थ पूरा नभएपछि आफूलाई घेराबन्दी गर्न खोजेको आरोप लगाएका छन्। “स्वास्थ्यमा समस्या आई उपचारमा रहेका बेला समेत आफुमाथी अनावश्यक आरोप लगाइनु अमानवीय हो,” उनले भने।

नगरपालिकामा पछिल्लो समय बेरुजु बढ्दै गएको भन्दै शर्मा योजना भुक्तानी तथा जनप्रतिनिधिको सेवा–सुविधा भुक्तानीमा कडाइ गरिरहेको दाबी गर्छन्। उनले यही कारण केही पक्ष असन्तुष्ट बनेको र आफूविरुद्ध रणनीतिक रूपमा घेराबन्दी थालिएको आरोप लगाएका छन्।