बाजुरामा बिहेमा गएका २ समुहबिच झडप, एकको मृत्यु

पश्चिम रैवार १ महिना अगाडि

बाजुरा । बाजुराको बुढीगंगा नगरपालिका-८ मोटाबाडामा बिहेको निम्तोमा गएका दुई समूहबीच दोहोरो झडप हुँदा एक जनाको मृत्यु भएको छ।

झडपमा परेर गम्भीर घाइते भएका बुढीगंगा नगरपालिका-८ डुंग्रीटोलाका अन्दाजी २९ वर्षीय रणबहादुर थापाको उपचारका क्रममा अछामको बयालपाटा अस्पतालमा मृत्यु भएको जिल्ला प्रहरी कार्यालय बाजुराका सूचना अधिकारी जनक बोहराले जानकारी दिएका छन्।

बिहीबार राति बिहेको निम्तो खान गएका दुई समूहबीच विवाद भई दोहोरो झडप भएको थियो। घटनामा संलग्न भएको आशंकामा प्रहरीले प्रारम्भिक अनुसन्धानका आधारमा बुढीगंगा नगरपालिका-७ का खेमराज विष्ट, लोकेन्द्र खड्का, दीर्घ विष्टलाई पक्राउ गरी सोधपुछ गरिरहेको छ। साथै, थप अनुसन्धानका लागि प्रहरीले दुई जना अन्यलाई पनि नियन्त्रणमा लिएको छ।

मृतक थापाको शव बयालपाटा अस्पतालबाट पोष्टमार्टमका लागि जिल्ला अस्पताल बाजुरा ल्याउने तयारी भइरहेको छ। प्रहरीले घटनाको विस्तृत अनुसन्धान गरिरहेको जनाएको छ।