पुँजीगत खर्चमा ढकारीकाे उल्लेख्य प्रगति : फागुन मसान्तभित्र ५० प्रतिशत खर्च

गाउँमै राेजगारी प्रदान गर्न अध्यक्ष प्रकाश साउँदका यस्ता छन् याेजना

धनराज साउँद ४ हप्ता अगाडि

अछाम – अछाम जिल्लाको ढकारी गाउँपालिकाले चालू आर्थिक वर्षको फागुन मसान्तसम्म करिब ५० प्रतिशत पुँजीगत रकम खर्च गरिसकेको छ।

गाउँपालिकाकाे यस आर्थिक बर्षकाे कुल ४० कराेड ९८ लाख ९३ हजार मध्य पुँजीगत तर्फ ८ कराेड ८९ लाख ४४ हजारकाे करिव ५० प्रतिशत बजेट खर्च गरेकाे हाे । अछामका अन्य पालिकाकाे तुलनामा फागुन मसान्तसम्मकाे ढकारी गाउँपालिकाकाे पुजीगत उपलव्धी उत्कृष्ठ हाे ।

गाउँपालिकाले असार १० गते गाउँसभा सम्पन्न गरेपछि श्रावण महिनादेखि नै पुँजीगत बजेट कार्यान्वयनमा ल्याएको थियो, जसका कारण विकास निर्माणका कार्यले तीव्रता पाएको छ।

गाउँपालिका अध्यक्ष प्रकाश साउँदका अनुसार कार्यालयको नियमित निगरानी, जनतासँगको समन्वय र प्रभावकारी योजना कार्यान्वयनका कारण विकास निर्माणमा उल्लेखनीय सुधार देखिएको छ। “गाउँपालिकाको सेवा प्रवाह र विकास निर्माणको गति तेज बनाउन म आफैं नियमित रूपमा कार्यालयमै रहन्छु,” अध्यक्ष साउँदले भने।

स्थानीय रोजगारी प्रवर्द्धन गर्दै विकास निर्माण

ढकारी गाउँपालिकाले आगामी वर्षदेखि विकास निर्माण कार्यमा स्थानीय रोजगारीलाई विशेष प्राथमिकता दिने नीति अघि सारेको छ। अध्यक्ष साउँदका अनुसार निर्माण कार्यमा डोजर तथा अत्याधुनिक मेसिनरी उपकरणको प्रयोग घटाएर स्थानीय नागरिकहरूको श्रम प्रयोग गरिनेछ।

“अध्यक्ष साउँदका अनुसार आगामी आर्थिक बर्षदेखी पालिकाभित्र रहेका नागरिकलाई आवश्यक तालिम प्रदान गरी दक्ष जनशक्ति तयार गरिनेछ, जसले उनीहरूलाई आयआर्जनको अवसर सिर्जना गर्नुका साथै विकासलाई दिगो बनाउन मद्दत गर्नेछ । यसका लागि गाउँपालिकाले आवश्यक नीति तथा योजना तयार गरिसकेको छ।

कृषिमा सुधार, आगामी वर्ष थप प्राथमिकता

गाउँपालिकाले कृषि क्षेत्रमा पनि उल्लेखनीय सुधार भएको दाबी गरेको छ। स्थानीय कृषकहरूलाई मल, बीउ तथा सिँचाइ सुविधा उपलब्ध गराइएकाले उत्पादन बढेको छ।

अध्यक्ष साउँदका अनुसार आगामी वर्ष कृषि कार्यलाई अझ व्यवस्थित बनाउँदै व्यावसायिक खेती प्रवर्द्धन गरिनेछ। “स्थानीयस्तरमै उत्पादन वृद्धि गर्न सकियो भने खाद्य सुरक्षामा सुधार आउँछ, रोजगारी सिर्जना हुन्छ र आर्थिक विकासलाई टेवा पुग्छ,” उनले थपे।

स्थानीयवासीहरूले गाउँपालिकाले थालेका प्रयासप्रति सकारात्मक प्रतिक्रिया दिइरहेका अध्यक्ष साउँदले बताएका छन्। उनीहरू विकास निर्माणका कामहरू अझ प्रभावकारी र पारदर्शी रूपमा अगाडि बढ्नेमा बिश्वस्त रहेका अध्यक्ष साउँदकाे भनाइ छ।

अध्यक्ष साउँदले आफूले गरेका कामहरूको मूल्यांकनप्रति पूर्ण रूपमा सन्तुष्ट रहेको भन्दै आगामी वर्ष थप योजनाबद्ध रूपमा विकास निर्माण तथा सेवा प्रवाहलाई प्रभावकारी बनाइने प्रतिबद्धता व्यक्त गरे।

भिडियाे हेराै :-