मंगलसैन नगरले पायो फुल हाकिम : अधिकृत डाँगीको स्वागत

धनराज साउँद ३ हप्ता अगाडि

अछाम । लामो समयदेखी प्रमुख प्रशासकीय अधिकृतविहीन बनेको मङ्गलसेन नगरपालिकाले अन्ततः नयाँ प्रमुख प्रशासकीय अधिकृत पाएको छ। संघीय मामिला तथा सामान्य प्रशासन मन्त्रालयले गेहेन्द्र बहादुर डागीलाई प्रमुख प्रशासकीय अधिकृतका रूपमा खटाएको हो ।

उनलाई नगरमा स्वागत गरिएको छ । नगर प्रमुख पदम बहादुर बोहराको नेतृत्वमा नगरपालिकाका पदाधिकारी, कर्मचारी तथा स्थानीय प्रतिनिधिहरूले स्वागत गरेका हुन् ।
नगर प्रमुख बोहराले डागीलाई स्वागत गर्दै नगरपालिकाको सेवा प्रवाहलाई प्रभावकारी बनाउन सहकार्य गर्ने प्रतिबद्धता व्यक्त गरे।

प्रमुख प्रशासकीय अधिकृत डागीले पदबहाली गर्दै नगरवासीलाई आवश्यक सेवा सहज रूपमा उपलब्ध गराउने र विकास निर्माणका कामलाई प्राथमिकता दिने बताए।

यसअघि प्रमुख प्रशासकीय अधिकृतको पद रिक्त भएपछि मङ्गलसेन नगरपालिकाको प्रशासनिक कामकाज ठप्प बनेको थियो। सेवाग्राहीहरू आवश्यक सेवा नपाउँदा मर्कामा परेका थिए। निमित्त प्रमुख प्रशासकीय अधिकृतका रूपमा कार्यरत खकेन्द्र बहादुर सोडारीलाई संघीय मामिला तथा सामान्य प्रशासन मन्त्रालयले माघ ९ गतेदेखि लागू हुने गरी जिम्मेवारीबाट हटाएपछि नगरपालिकामा नेतृत्व सङ्कट उत्पन्न भएको थियो।

नयाँ प्रमुख प्रशासकीय अधिकृत डागीले पदबहाली गरेसँगै प्रशासनिक संकट समाधानको अपेक्षा गरिएको छ। नगरपालिकाका स्रोतहरूका अनुसार उनले तत्काल प्राथमिकता दिई नगरपालिकाको अवरुद्ध काम सुचारु गर्न प्रयास गर्ने प्रतिबद्धता जनाएका छन्।

नगरपालिकाका सेवाग्राही, स्थानीय बासिन्दा तथा सरोकारवाला निकायले अब नगरपालिकाको सेवा प्रवाह सहज र प्रभावकारी हुने अपेक्षा गरेका छन्।

धनराज साउँद

साउँद रेडियो बान्नीगढीको कार्यकारी निर्देशकका साथै पश्चिम रैवारको प्रकाशक हुन् । उनले खोज अनुसन्धान तथा समसमायीक बिषयमा कलम चलाउँछन् ।