मेल्लेखमा विद्युतीय हाजिरी अनिवार्य : ढर्राको हाजिरले तलव भत्ता नपाईने

धनराज साउँद १ हप्ता अगाडि

अछाम – मेल्लेख गाउँपालिकाले कर्मचारी प्रशासनलाई अझ पारदर्शी, प्रभावकारी र अनुशासित बनाउन विद्युतीय हाजिरी प्रणाली (Digital Attendance System) लागू गरेको छ। २०८१ साल चैत ८ गते सम्पन्न गाउँपालिकाको कार्यपालिकाको बैठकले यसबारे महत्वपूर्ण निर्णय गर्दै अबदेखि सम्पूर्ण कर्मचारीहरूको तलब भुक्तानी विद्युतीय हाजिरीको आधारमा हुने व्यवस्था गरेको छ।

कार्यपालिका बैठकको निर्णय पश्चात् कार्यान्वयनका लागि गाउँपालिका सूचना जारी गरेको छ। सूचनामा गाउँपालिकाका सबै कर्मचारीलाई अनिवार्य रूपमा विद्युतीय हाजिरी गर्न आग्रह गरिएको छ।

यस प्रणाली अन्तर्गत कर्मचारीहरूको हाजिरी अनलाइन प्रणालीमा दर्ता हुनेछ, जसले समय व्यवस्थापन, पारदर्शिता र उपस्थितिको विश्वसनीयता सुनिश्चित गर्ने गाउँपालिकाका प्रमुख प्रशासकीय अधिकृत हिक्मत बहादुर बुढाले बताएका छन् ।

गाउँपालिकाले प्रविधिमैत्री प्रशासनिक प्रणालीलाई सुदृढ गर्दै डिजिटल व्यवस्थापनको सुरुवात गरेको हो।

विद्युतीय हाजिरी दर्ता नभएका कर्मचारीहरूले सूचना प्रविधि शाखामा तत्काल सम्पर्क गर्नुपर्ने सूचनामा उल्लेख छ।

गाउँपालिकाको यो कदमले सरकारी कार्यालयहरूमा प्रविधिको प्रभावकारी प्रयोग बढाउने मात्र होइन, कर्मचारीहरूको कार्यसम्पादन पनि व्यवस्थित बनाउने विश्वास गरिएको छ।