अछाममा सामुदायिक बन फडानी: पदाधिकारी र डिभिजन बन कार्यालयको मिलेमतो

धनराज साउँद ४ दिन अगाडि

अछाम । अछाममा सामुदायिक बनका पदाधिकारी र डिभिजन बन कार्यालयको मिलेमतोमा व्यापक बन फडानी भएको छ। जिल्लाको कमलबजार नगरपालिका र पञ्चदेवल विनायक नगरपालिकाको लेक क्षेत्रका सामुदायिक बनबाट अवैध रूपमा चुत्रो (तिर्खुला) का डाँठ तथा बोक्रा विक्री भइरहेको छ।

कमलबजार नगरपालिका वडा नम्बर ५ स्थित पाँचुली चैतेपातल सामुदायिक बनबाट मात्रै १३ हजार किलो चुत्रो विक्री गरिएको खुलेको छ। उक्त विक्रीमा सामुदायिक बनका पदाधिकारी, डिभिजन बन कार्यालय विनायक र मंगलसेनका कर्मचारीको मिलेमतो रहेको पाइएको छ। जिल्लाका विभिन्न बन उपभोक्ता समितिहरूले डिभिजन बन कार्यालयबाट अनुमति लिएर बन पैदावार संकलन गरिरहेका छन्।

कृते भेला गरेर बन पैदावार विक्री
कमलबजार नगरपालिका ५ स्थित पाँचुली चैतेपातल सामुदायिक बनका पदाधिकारीले कृते भेला गरी बन पैदावार बेच्ने निर्णय गरेको खुलासा भएको छ। भेलाको निर्णय पुस्तिकामा विभिन्न व्यक्तिहरूको नाम लेखी नक्कली हस्ताक्षर गरिएको पाइएको छ। यसरी तयार पारिएको कागजातका आधारमा डिभिजन बन कार्यालयबाट बन पैदावार बेच्ने अनुमति लिइएको छ।

सामुदायिक बन उपभोक्ता समितिका अध्यक्ष जयप्रकाश उपाध्याय आठ महिनादेखि कैलालीमा छन्, तर निर्णय पुस्तिकामा उनको हस्ताक्षर देखिन्छ। उनले आफूले कुनै पनि हस्ताक्षर नगरेको स्पष्ट पारेका छन्। त्यस्तै, कमलबजार नगरपालिका ५ का खगेन्द्र उपाध्यायले पनि आफू कैलालीमै रहँदा आफ्नो नाममा हस्ताक्षर भएको भन्दै भेलालाई कृते रहेको बताए। उक्त निर्णय पुस्तिकामा वडा अध्यक्ष सत्यराज तिमिल्सैनाको हस्ताक्षरसमेत छ, तर उनले बनको कुनै भेला नभएको बताएका छन्।

डिभिजन बन कार्यालयकै मिलेमतोमा अनियमितता
डिभिजन बन कार्यालय मंगलसेनका प्रमुख जनक पाध्याका अनुसार अछाम जिल्लाबाट चुत्रो जातको पैदावार निकासीका लागि १० हजार किलोको मात्र कोटा छ। तर, उक्त कार्यालयले पाँचुली चैतेपातल सामुदायिक बनलाई १३ हजार किलो चुत्रो निकासीको अनुमति दिएको छ। जिल्लाका अन्य पालिकाहरूबाट पनि चुत्रो काटेर विक्री गरिएको छ।

स्थानीयहरू सामुदायिक बन फडानीको विरोधमा उत्रिएका छन्। कमलबजार नगरपालिका ५ का स्थानीय जीवन तिमिल्सैनाले बन फडानी गर्नेविरुद्ध मुद्दा दर्ता गर्ने बताएका छन्।

डिभिजन बन कार्यालय मूकदर्शक
दामासाही रूपमा बनका बुट्यान काटिँदा सामुदायिक बनहरू उजाड बनेका छन्। तर, डिभिजन बन कार्यालयहरूले कुनै कदम चालेका छैनन्। सामुदायिक बन कटान आदेशका लागि सिफारिस गर्ने डिभिजन बन कार्यालय विनायकका प्रमुख गणेश ठगुन्नाले भने बन फडानीमा कर्मचारीको संलग्नता नरहेको दाबी गरेका छन्।

तर, स्थानीयहरू भने डिभिजन बन कार्यालयको मिलेमतोबिना यति ठूलो मात्रामा बन फडानी हुन नसक्ने बताउँछन्। यस विषयमा गहन अनुसन्धान र कारबाही आवश्यक रहेको उनीहरूको माग छ।

धनराज साउँद

साउँद रेडियो बान्नीगढीको कार्यकारी निर्देशकका साथै पश्चिम रैवारको प्रकाशक हुन् । उनले खोज अनुसन्धान तथा समसमायीक बिषयमा कलम चलाउँछन् ।